ليـــه سمّاني فـــرح؟! وعمري ماشفت الفـــرح

والله وصرتي عروس..وتفهمين..
والله وكبرتي يافرح..
اذكر بيوم انولدتي..
ويوم بشرني أبوك..
كان فرحان بقدومك..وكان يرسملي عيونك
كنت أعظم أمنياته..شي أغلى من حياته
وكان يشوفك في عيونه غيــــر عن كل البشر..
درة ولا كل الدرر..
وأذكر أول مامشيتي..
خطوة خطوة من بديتي..
خطوة خطوة..

تدرين إنك تشبهينه..
حيل والله تشبهينه..
بسمتك هي بسمته..ونظرتك هي نظرته
إنت كلك مثله هو..
بنت من ذاك الأبو..
والله وكبرتي يافرح..وصرتي عروس وتفهمين..

قالت اسمعني ياعمي..
بشتكيلك بعض همي..
لا تناظرني صغيره..
والفكر ما اقدر اديره..
علمتني قسوة الطاغي أشياء كثيره..
وعلمتني دمعة أمي..
لا بكت باليل وهـيا ترتجي ربي يرده..
من بعد ماغاب مده..

عمي والله مااتصور شنهي العيشه بدونه..

وعمي والله ما أبي أكثر غير أنا اناظر عيونه..
مدري مل الصبر مني..ولاّ مليته أنا..أو كلــنا؟!
حــايره..
حايره والله ياعمي..
وزوّد الحيره سؤال..بسألك..فيها مجال؟
قولي يلا وخلصيني..
دمعتي حارت بعيني..
قولي وابديلي السؤال..
ايــــه عمي بسألك..

ليــــه سمّاني فـــرح..وعمري ما شفت الفــــرح؟!!

ليه ما سمّاني هم أو عنا ولاّ شتات..
وليه ما سمّاني حزن يطوي أحلى الذكريات..

ليه يتركني ويروح؟!
ويترك أمي له تنوح؟!
ويحرم عيوني المبات..

ايه أنا اكبر ويكبر داخلي همي معاي..
وكل يوم يمر يكثر داخل احساسي عناي..

ما اتصور..
عيشتي والله بدونه..
وما اتصور..
شوقي لمناظر عيونه
ولمسة إيديه ودفاه..
ولهفتي لاقال بنتي..
وادمعت عيني للقاه..

عمي..مل الصبر مني ولاّ مليته أنا..أو كلـــنا؟!

لحظه فــرح..
اسمعيني..
وادري انك تفهميني..
اسمعيني..
خلي إيمانك مع إلي..ما انخذل منهو رجاه..
واحدٍ بإذنه يحرر أسرى من ظلم الطغاه..
ولا خذاك الشووووق يمــه..
ثم ولــه قلبك عليه..
ناظريه بكل يوم لا شرق فجــر جديد..
وناظريه بأوسط علمنا له تبوحوله النشيد..
وناظريه بعيون جابر..
تعرفينه؟؟
قالت إيه الشيخ جابر..

والله وكبرتي يافرح..وصرتي عروس
وتفهمين...

للشاعر/فيصل العدواني

ماأجملها من كلمات

ملاكـ
أسعدني تواجدك..